ye soch kar ki terii jabiin par na bal pade - Shehzad Ahmed
ye soch kar ki terii jabiin par na bal pade
bas duur hii se dekh liyaa aur chal pade
dil men phir ik kasak-sii uthii muddaton ke baad
ik umr ke ruke hue aansuu nikal pade
siine men beqaraar hain murdaa muhabbaten
mumkin hai ye charaag kabhii Khud hii jal pade
ai dil tujhe badalatii huii rut se kyaa milaa
paudhon men phuul aur daraKhton men phal pade
ab kis ke intazaar men jaagen tamaam shab
vo saath ho to niind men kaise Khalal pade
'Shehzad' dil ko zabt kaa yaaraa nahiin rahaa
nikalaa jo maahataab samandar uchhal pade
0 comments:
Post a Comment