ab tak us kii muhabbat kaa nashaa taarii hai - Shehzad Ahmed

ab tak us kii muhabbat kaa nashaa taarii hai

phuul baaqii nahiin Khushbuu kaa safar jaarii hai

sahar lagataa hai pasiine men nahaayaa huaa jism

ye ajab Khvaab men duubii huii bedaarii hai

aaj kaa phuul terii kokh se zaahir hogaa

shaaKh-e-dil Khushk ha no ab ke terii baarii hai

dhyaan bhii us kaa hai milate bhii nahiin hain us se

jism se bair hai saaye se vafaadaarii hai

dil ko tanhaaii kaa ahasaas bhii baaqii na rahaa

vo bhii dhundhalaa gaii jo shakl bahut pyaarii hai

is tag-o-taaz men tuute hain sitaare kitane

aasmaan jiit sakaa hai na zamiin haarii hai

koii aayaa hai zaraa aankh to kholo 'Shehzad'

abhii jaage the abhii sone kii taiyaarii hai