tay honge kis tarah ye maraahil kahaa na jaae - Shehzad Ahmed
tay honge kis tarah ye maraahil kahaa na jaae
is tiiragii men kyaa hai muqaabil kahaa na jaae
Khud de diye hain main ne use haath kaat kar
vo likh diyaa hai jo sar-e-mahafil kahaa na jaae
patthar hue vo lafz ke the jiite jaagate
is Khaamashii se kyaa huaa haasil kahaa na jaae
ab tak to chal rahen hain tere saath saath ham
aayengii kis jagah had-e-faasil kahaa na jaae
nashaa hai yaa ke zahar fizaa men milaa huaa
kuchh hai har ek chiiz men shaamil kahaa na jaae
aaKhir kahiin to baith gaye paanv tod kar
phir kyaa kahenge agar ise manzil kahaa na jaae
ye aur baat kuchh bhii dikhaaii na de sake
aankhen khulii huii hon to gaafil kahaa na jaae
0 comments:
Post a Comment