samajh men ye nahiin aataa ki dil kii Khuu kyaa thii - Shehzad Ahmed
samajh men ye nahiin aataa ki dil kii Khuu kyaa thii
safar to aath pahar kaa thaa justajuu kyaa thii
vo aabashaar ke paanii sii tab'a rakhataa thaa
magar thake huye lahaje kii guftaguu kyaa thii
huii shikast jahaan fateh kaa yaqiin huaa
koii chhupaa huaa dushman thaa aarazuu kyaa thii
talaash karate ho kis shay ko is Kharaabe men
daraKht hii na rahe shaaKh-e-rang-o-buu kyaa thii
tuu aaftaab agar thaa to kyon guruub huaa
ye raushanii see tere baad chaar-suu kyaa thii
daraKht puKhtaa chhaten tod kar nikal aaye
ye ik azaab hii thaa quuvat-e-namuu kyaa thii
0 comments:
Post a Comment