nahiin ki mujhako qayaamat kaa etiqaad nahiin - Mirza Ghalib

nahiin ki mujhako qayaamat kaa etiqaad nahiin

shab-e-firaaq se roz-e-jazaa ziyaad nahiin

koii kahe ki shab-e-mah men kyaa buraaii hai

balaa se aaj agar din ko abr-o-baad nahiin

jo aauun saamane un ke to marahabaa na kahen

jo jaauun vaan se kahiin ko, to khairabaad nahiin

kabhii jo yaad bhii aataa huun main to kahate hain

ke aaj bazm men kuchh fitnaa-o-fasaad nahiin

alaavaa iid ke milatii hai aur din bhii sharaab

gadaa-e-kuuchaa-e-maikhaanaa naamuraad nahiin

jahaan men ho gam-o-shaadii baham, hamen kyaa kaam

diyaa hai hamako khudaa ne vo dil ke shaad nahiin

tum un ke vaade zikr un se kyuun karo "ghalib"

ye kyaa ke tum kaho aur vo kahen ke yaad nahiin