phir is andaaz se bahaar aaii - Mirza Ghalib
phir is andaaz se bahaar aaii
ke huye mehar-o-maah tamaashaaii
dekho ai sakinaan-e-khittaa-e-khaak
is ko kahate hain aalam-aaraaii
ke zamiin ho gaii hai sar taa sar
ruukash-e-satahe charkhe minaaii
sabze ko jab kahiin jagah na milii
ban gayaa ruu-e-aab par kaaii
sabz-o-gul ke dekhane ke liye
chashm-e-nargis ko dii hai binaaii
hai havaa men sharaab kii taasiir
badaanoshii hai baad paimaaii
kyuun na duniyaa ko ho khushii "ghalib"
shaah-e-diindaar ne shifaa paii
0 comments:
Post a Comment