na shouq e visl na ranj e firaq rakhtay hain - Ahmed Faraz

na shouq e visl na ranj e firaq rakhtay hain

mager ye log tera ishtiyaq rakthay hain

ye hum jo tujh pe hain naazaan to is sabab se k hum

zamanay waloon se behter mazaq rakhtay hain

ham ehl e dil se koi kyun milay k ham se faqir

ne etr o ood na saz o yaraaq rakhtay hain

jamal e yaar faqat chashm o lab ki baat nahin

so ham khayal e syaq o sabaq rakhtay hain

misal e shieesha e khali kitab e aql ko bhi

ham ehl e maikadah bala e taaq rakhtay hain

shayookh e shehr se kya bahs k jo girah main faqt

do harf e eqd o seh harf e talaq rakhtay hain

faraz khosh ho k tujh se khafa hain fatwa faroosh

bhalay se ye bhi kahain ittefaq rakhtay hain