jiine vaale qazaa se darate hain - Shakeel Badayuni

jiine vaale qazaa se darate hain

zahar piikar davaa se darate hain

zaahidon ko kisii kaa khauf nahiin

sirf kaalii ghataa se darate hain

aah jo kuchh kahe hamen manzuur

nek bande khudaa se darate hain

dushmanon ke sitam kaa khuaf nahiin

doston kii vafaa se darate hain

azm-o-himmat ke baavajuud "shakeel"

ishq kii ibtadaa se darate hain