mere ham-nafas, mere ham-navaa, mujhe dost banake dagaa na de - Shakeel Badayuni
mere ham-nafas, mere ham-navaa, mujhe dost banake dagaa na de
main huun dard-e-ishq se jaanvalab, mujhe zindagii kii duaa na de
mere daag-e-dil se hai raushanii, usii raushanii se hai zindagii
mujhe dar hai aye mere chaaraagar, ye charaag tuu hii bujhaa na de
mujhe chhod de mere haal par, teraa kyaa bharosaa hai chaaraagar
ye terii nawaazish-e-mukhtasar, meraa dard aur badaa na de
meraa azm itanaa baland hai ke paraaye sholon kaa dar nahiin
mujhe khauf aatish-e-gul se hai, ye kahiin chaman ko jalaa na de
wo uthe hain leke hom-o-subuu, arey o 'shakeel' kahaan hai tuu
teraa jaam lene ko bazm men koii aur haath badaa na de
0 comments:
Post a Comment