gair len mahafil men bose jaam ke

gair len mahafil men bose jaam ke

ham rahen yuun tashnaalab paigaam ke

khastagii ka tum se kyaa shikavaa ke ye

hathakande hain charkh-e-niilii faam ke

khat likhenge garche matalab kuchh na ho

ham to aashiq hain tumhaare naam ke

raat pii zam-zam pe may aur subh-dam

dhoe dhabbe jaamaa-e-eharaam ke

dil ko aankhon ne phansaayaa kyaa magar

ye bhii halqe hain tumhaare daam ke

shaah ke hai gusl-e-sehat kii khabar

dekhiye din kab phiren hammaam ke

ishq ne 'ghalib' nikammaa kar diyaa

varnaa ham bhii aadamii the kaam ke