dil men ik lahar sii uthii hai abhii - Nasir Kazmi

dil men ik lahar sii uthii hai abhii

koii taazaa havaa chalii hai abhii

shor barpaa hai Khaanaa-e-dil men

koii diivaar sii girii hai abhii

kuchh to naazuk mizaaj hain ham bhii

aur ye chot bhii naii hai abhii

bharii duniyaa men jii nahiin lagataa

jaane kis chiiz kii kamii hai abhii

tuu shariik-e-suKhan nahiin hai to kyaa

ham-suKhan terii Khaamoshii hai abhii

yaad ke be-nishaan jaziiron se

terii aavaaz aa rahii hai abhii

shahar ke becharaag galiyon men

zindagii tujh ko dhuundhatii hai abhii

[becharaag = dark/without light]

so gaye log us havelii ke

ek khidakii magar khulii hai abhii

tum to yaaro abhii se uth baithe

shahar men raat jaagatii hai abhii

vaqt achchhaa bhii aayegaa 'nasir'

gam na kar zindagii padii hai abhii