dil dhadakane kaa sabab yaad aayaa - Nasir Kazmi
dil dhadakane kaa sabab yaad aayaa
vo terii yaad thii ab yaad aayaa
aaj mushkil thaa sambhalanaa ai dost
tuu musiibat men ajab yaad aayaa
din guzaaraa thaa badii mushkil se
phir teraa vaadaa-e-shab yaad aayaa
teraa bhuulaa huaa paimaan-e-vafaa
mar rahenge agar ab yaad aayaa
phir kaii log nazar se guzare
phir koii shahar-e-tarab yaad aayaa
haal-e-dil ham bhii sunaate lekin
jab vo ruKhsat hue tab yaad aayaa
baith kar saayaa-e-gul men 'nasir'
ham bahut roye vo jab yaad aayaa
0 comments:
Post a Comment