main nazar se pii rahaa huun ye samaa badal na jaaye - Anwar Mirzapuri

main nazar se pii rahaa huun ye samaa badal na jaaye

na jhukaao tum nigaahen kahiin raat dhal na jaaye

mere ashk bhii hain is men ye sharaab ubal na jaaye

meraa jaam chhuunevaale teraa haath jal na jaaye

abhii raat kuchh hai baaqii na uthaa naqaab saaqii

teraa rind girate girate kahiin phir sambhal na jaaye

merii zindagii ke maalik mere dil pe haath rakhanaa

tere aane kii khushii men meraa dam nikal na jaaye

mujhe phuunkane se pahale meraa dil nikaal lenaa

ye kisii kii hai amaanat kahiin saath jal na jaaye