ye dil kabhii na muhabbat men kaamayaab huaa - Bekhud Dehlvi

ye dil kabhii na muhabbat men kaamayaab huaa

mujhe Kharaab kiyaa, aap bhii Kharaab huaa

ajal men, ziist men turabat men, hashr men zaalim

tere sitam ke liye main hii intaKhaab huaa

nigaah-e-mast ko saaqii kii kaun de ilzaam

meraa nasiib ki rusavaa meraa shabaab huaa

hamaare ishq kii das-biis ne bhii daad na dii

kisii kaa husn zamaane men intaKhaab huaa

fanaa kaa daavaa hazaaron ko thaa zamaane men

habaab ne mujhe dekhaa to aab-aab huaa