ye bhii kyaa shaam-e-mulaaqaat aaii - Nasir Kazmi

ye bhii kyaa shaam-e-mulaaqaat aaii

lab pe mushkil se terii baat aaii

subah se chup hain tere hijr nasiib

haaye kyaa hogaa agar raat aaii

bastiyaan chhod ke barase baadal

kis qayaamat kii ye barasaat aaii

koii jab mil ke huaa thaa ruKhsat

dil-e-betaab vahii raat aaii

saayaa-e-zulf-e-butaan men 'nasir'

ek se ek naii raat aaii