tujh se mil ke dil men rah jaatii hai aramaanon kii baat - Wamiq Jaunpuri

tujh se mil ke dil men rah jaatii hai aramaanon kii baat

yaad rahatii hai kise saahil pe tuufaanon kii baat

vo to kahiye aaj bhii zanjiir men jhankaar hai

varnaa kis ko yaad rah jaatii hai diivaanon kii baat

kyaa kabhii hogii kisii kii tuu magar ai zindagii

jaan de kar ham ne rakh lii tere diivaanon kii baat

bazm-e-anjum ho ke bazm-e-khaak-taa-bazm-e-khayaal

jis jagah jaao sunaaii degii insaanon kii baat

phuul se bhii narm-tar 'Wamiq' kabhii apanaa kalaam

aur kabhii talavaar ham aashuftaasaamaanon kii baat