jo dil ne kahii lab pe kahaan aaii hai dekho - Zahra Nigaah
jo dil ne kahii lab pe kahaan aaii hai dekho
ab mahafil-e-yaaraan men bhii tanhaaii hai dekho
phuulon se havaa bhii kabhii ghabaraaii hai dekho
gunchon se bhii shabanam kabhii kataraaii hai dekho
ab zauq-e-talab vajah-e-junuun thair gayaa hai
aur arz-e-vafaa baais-e-rusvaaii hai dekho
gam apane hii ashkon kaa khariidaar huaa hai
dil apanii hii haalaat kaa tamaashaaii hai dekho
0 comments:
Post a Comment