shikave ke naam se bemehar khafaa hotaa hai - Mirza Ghalib

shikave ke naam se bemehar khafaa hotaa hai

ye bhii mat kah ke jo kahiye to gilaa hotaa hai

pur huun main shikave se yuun raag se jaise baajaa

ik zaraa chhediye phir dekhiye kyaa hotaa hai

go samajhataa nahiin par husn-talaafii dekho

shikavaa-e-jaur se sar-garm-e-jafaa hotaa hai

ishq kii raah men hai charkh-e-makaukab kii vo chaal

sust-rau jaise koii aabalaapaa hotaa hai

kyuun na thaharen hadaf-e-naavak-e-bedaad ke ham

aap uthaa laate hain gar tiir khataa hotaa hai

khuub thaa, pahale se hote jo ham apane bad-khvaah

ke bhalaa chaahate han aur buraa hotaa hai

naalaa jaataa thaa pare arsh se meraa aur ab

lab tak aataa hai, jo aisaa hii rasaa hotaa hai