shauq har rang raqiib-e-sar-o-saamaan nikalaa - Mirza Ghalib
shauq har rang raqiib-e-sar-o-saamaan nikalaa
qais tasaviir ke parde men bhii uriyaan nikalaa
zakhm ne daad na dii tangii-e-dil kii yaarab
tiir bhii siinaa-e-bismil se parafshaan nikalaa
buu-e-gul naalaa-e-dil duud-e-charaag-e-mahafil
jo terii bazm se nikalaa so parishaan nikalaa
dil-e-hasaratzadaa thaa maaiidaa-e-lazzat-e-dard
kaam yaaron kaa baqadr-e-lab-o-dandaan nikalaa
thii nauaamoz-e-fanaa himmat-e-dushvaarpasand
sakht mushkil hai ki ye kaam bhii aasaan nikalaa
dil men phir giriyaa ne ik shor uthaayaa 'ghalib'
aah jo qataraa na nikalaa thaa so tuufaan nikalaa
0 comments:
Post a Comment