rone se aur ishq men bebaak ho gae - Mirza Ghalib
rone se aur ishq men bebaak ho gae
dhoe gae ham aise ki bas paak ho gae
sarf-e-bahaa-e-mai hue aalaat-e-maikashii
the ye hii do hisaab so yon paak ho gae
rusavaa-e-dahar go hue aavaargii se tum
baare tabiiyaton ke to chaalaak ho gae
kahataa hai kaun naalaa-e-bulbul ko beasar
parde men gul ke laakh jigar chaak ho gae
puuchhe hai kyaa vajuud-o-adam ahl-e-shauq kaa
aap apanii aag se khas-o-khaashaak ho gae
karane gaye the us se tagaaful kaa ham gilaa
kii ek hii nigaah ki bas khaak ho gae
is rang se uthaaii kal us ne 'asad' kii naash
dushman bhii jis ko dekh ke gamnaak ho gae
0 comments:
Post a Comment