rukh men gard-e-malaal thii kyaa thii - Khalil ur Rahman Azmi
rukh men gard-e-malaal thii kyaa thii
haasil-e-maah-o-saal thii kyaa thii
ek suurat sii yaad hai ab bhii
aap apanii misaal thii kyaa thii
mere jaanib uthii thii koii nigaah
ek mubaham savaal thii kyaa thii
us ko paakar bhii us ko paa na sakaa
justajuu-e-jamaal thii kyaa thii
dil men thii par labon tak aa na sakii
aarazuu-e-visaal thii kyaa thii
umr bhar men bas ek baar aaii
sa'at-e-laazavaal thii kyaa thii
koii khvaahaan na thaa ki jins-e-hunar
ek muflis kaa maal thii kyaa thii
0 comments:
Post a Comment