jalataa nahiin aur jal rahaa huun - Khalil ur Rahman Azmi
jalataa nahiin aur jal rahaa huun
kis aag men main pighal rahaa huun
mafaluuj hain haath-paanv mere
phir zahan men kyuun chal rahaa huun
raaii kaa banaa ke ek parvat
ab is pe khud hii phisal rahaa huun
kis haath se haath main milaauun
ab apane hii haath mal rahaa huun
kyon aaiinaa baar baar dekhuun
main aaj nahiin jo kal rahaa huun
ab kaun saa dar rahaa hai baaqii
us dar se kyon main nikal rahaa huun
qadamon ke tale to kuchh nahiin hai
kis chiiz ko main kuchal rahaa huun
ab koii nahiin rahaa sahaaraa
main aaj se phir sambhal rahaa huun
ye barf hataao mere sar se
main aaj kuchh aur jal rahaa huun
0 comments:
Post a Comment