rokataa hai gam-e-izhaar se pindaar mujhe - Mustafa Zaidi

rokataa hai gam-e-izhaar se pindaar mujhe

mere ashkon se chhupaa le mere ruKhsaar mujhe

dekh ai dasht-e-junuun bhed na khulane paaye

dhuundhane aaye hain ghar ke dar-o-diivaar mujhe

sii diye honth usii shaKh kii majabuurii ne

jis kii qurbat ne kiyaa maharam-e-asraar mujhe

merii aankhon kii taraf dekh rahe hain anjum

jaise pahachaan gaii ho shab-e-bedaar mujhe

jins-e-viiraanii-e-saharaa merii dukaan men hai

kyaa khariidegaa tere shahar kaa baazaar mujhe

jaras-e-gul ne kaii baar bulaayaa lekin

le gaii raah se zanjiir kii jhankaar mujhe

naavak-e-zulm uthaa dashnaa-e-andoh sambhaal

lutf ke Khanjar-e-benaam se mat maar mujhe

saarii duniyaa men ghanii raat kaa sannaataa thaa

sahan-e-zindaan men mile subah ke aasaar mujhe