phirataa liye chaman men hai diivaanaapan mujhe - Ibrahim Zauq

phirataa liye chaman men hai diivaanaapan mujhe

zanjiir-e-paa hai mauj-e-nasiim-e-chaman mujhe

huun shamaa yaa ki sholaa khabar kuchh nahiin magar

fanuus ho rahaa hai meraa pairaahan mujhe

kuuche men terii kaun thaa letaa bhalaa khabar

shab chaandanii ne aake pahanaayaa kafan mujhe

dikhalaataa ik adaa men hai sau-sau tarah banaav

kis saadaapan ke saath, teraa baankapan mujhe

aayaa huun nuur leke main bazm-e-sukhan men 'Zauq'

aankhon pe sab bithaayenge ahal-e-sukhan mujhe