parde parde men aataab achchhe nahiin - Daag Dehlvi

parde parde men aataab achchhe nahiin

aise andaaz-e-hijaab achchhe nahiin

mayakade men ho gaye chup-chaap kyon

aaj kuchh mast-e-sharaab achchhe nahiin

ai falak kyaa hai zamaane kii bisaat

dam-ba-dam ke inqalaab achchhe nahiin

bazm-e-vaaiz be-sharaan achchhe nahiin

aise jalase be-sharaab achchhe nahiin

taubaa kar len ham may-o-maashuuq se

be-mazaa hain ye savaab achchhe nahiin

ik najuumii "daag" se kahataa thaa aaj

aap ke din ai janaab achchhe nahiin