maze jahaan ke apanii nazar men khaak nahiin - Mirza Ghalib
maze jahaan ke apanii nazar men khaak nahiin
sivaay khuun-e-jigar, so jigar men khaak nahiin
magar gubaar hue par hava udaa le jaaye
vagarnaa taab-o-tavaan baal-o-par men khaak nahiin
ye kis bahiishtshamaail kii aamad-aamad hai
ke gair jalvaa-e-gul raahguzar men khaak nahiin
bhalaa use na sahii, kuchh mujhii ko raham aataa
asar mere nafas-e-beasar men khaak nahiin
khayaal-e-jalvaa-e-gul se kharaab hai maikash
sharaabkhaane ke diivar-o-dar men khaak nahiin
huaa huun ishq kii gaaratgarii se sharmindaa
sivaay hasrat-e-taamiir ghar men khaak nahiin
hamaare sher hain ab sirf dillagii ke 'asad'
khulaa ki faayedaa arz-e-hunar men khaak nahiin
0 comments:
Post a Comment