maruun to main kisii chehare men rang bhar jaauun - Ahmed Nadeem Qasmi
maruun to main kisii chehare men rang bhar jaauun
'nadeem' kaash yahii ek kaam kar jaauun
ye dasht-e-tark-e-muhabbat ye tere qurb kii pyaas
jo izaan ho to terii yaad se guzar jaauun
meraa vajuud merii ruuh ko pukaarataa hai
terii taraf bhii chaluun to thahar thahar jaauun
tere jamaal kaa paratau hai sab hasiinon par
kahaan kahaan tujhe dhuundhuun kidhar kidhar jaauun
main zindaa thaa ki teraa intazaar Khatm na ho
jo tuu milaa hai to ab sochataa huun mar jaauun
ye sochataa huun ki main butparast kyuun na huaa
tujhe qariib jo paauun to Khud se dar jaauun
kisii chaman men bas is Khauf se guzar na huaa
kisii kalii pe na bhuule se paanv dhar jaauun
ye jii men aatii hai taKhliiq-e-fan ke lamhon men
ki Khuun ban ke rag-e-sang men utar jaauun
0 comments:
Post a Comment