kiyaa mujh ishq ne zaalim kon aab aahistaa aahistaa - Wali Mohammed Wali

kiyaa mujh ishq ne zaalim kon aab aahistaa aahistaa

ke aatish gul ko karatii hai gulaab aahistaa aahistaa

vafaadaarii ne dilbar kii bujhaayaa aatish-e-gam kon

ke garmii dafaa karataa hai gulaab aahistaa aahistaa

ajab kuchh lutf rakhataa hai shab-e-khilvat men gulruu son

khitaab aahistaa aahistaa javaab aahistaa aahistaa

mere dil kon kiyaa bekhud terii ankhiyan ne aakhir kon

ke jiyon behosh karatii hai sharaab aahistaa aahistaa

huaa tujh ishq son ai aatishiinruu dil meraa paanii

ke jiyon galataa hai aatish son gulaab aahistaa aahistaa

adaa-o-naaz son aataa hai vo roshanjabiin ghar son

ki jiyon mashriq se nikale aaftaab aahistaa aahistaa

"Wali" mujh dil men aataa hai khayaal-e-yaar-e-beparavaah

ke jiyon ankhiyan men aataa hai khvaab aahistaa aahistaa