khulii jo aankh to vo thaa na vo zamaanaa thaa - Farhat Shehzad

khulii jo aankh to vo thaa na vo zamaanaa thaa

dahakatii aag thii tanhaaii thii fasaanaa thaa

gamon ne baant liyaa mujhe yuun aapas men

ke jaise main koii luutaa huaa khazaanaa thaa

ye kyaa ke chand hii qadamon pe thak ke baith gaye

tumhen to saath meraa duur tak nibhaanaa thaa

mujhe jo mere lahuu men dubo ke guzaraa hai

vo koii gair nahiin yaar ek puraanaa thaa

khud apane haath se "Shahzad" us ko kaat diyaa

ke jis darakht ke tahanii pe aashiyaanaa thaa