jis sar ko garuur aaj hai yaan taajavarii kaa - Meer Taqi Meer

jis sar ko garuur aaj hai yaan taajavarii kaa

kal us pe yahiin shor hai phir nauhaagarii kaa

aafaaq kii manzil se gayaa kaun salaamat

asabaab lutaa raah men yaan har safarii kaa

zindaan men bhii shorish na gaii apane junuun kii

ab sang madaavaa hai is aashuftaasarii kaa

har zakhm-e-jigar daavar-e-mahashar se hamaaraa

insaaf talab hai terii bedaadagarii kaa

is rang se jhamake hai palak par ke kahe tuu

tukaraa hai meraa ashk aqiiq-e-jigarii kaa

le saans bhii naazuk ke aahistaa hai bahut kaam

aafaaq kii is kaaragah-e-shiishaagarii kaa

tuk miir-e-jigar-sokhtaa kii jald khabar le

kyaa yaar bharosaa hai chiraag-e-saharii kaa