jis bazm men tuu naaz se guftaar men aave - Mirza Ghalib

jis bazm men tuu naaz se guftaar men aave

jaan kaalabad-e-suurat-e-diivaar men aave

saaye kii tarah saath phiren sarv-o-sanobar

tuu is qad-e-dilakash se jo gulazaar mwn aave

tay naaz-e-giraanmaayagii-e-ashk bajaa hai

jab lakht-e-jigar diidaa-e-khuunbaar men aave

de mujhako shikaayat kii ijaazat ki sitamagar

kuchh tujhako mazaa bhii mere aazaar men aave

us chashm-e-fusuungar kaa agar paaye ishaaraa

tuutii kii tarah aaiinaa guftaar mein aave

kaanton kii zabaan suukh gayii pyaas se yaa rab

ik aabalaapaa vaadii-e-purakhaar men aave

mar jaauun na kyon rashk se jab vo tan-e-naazuk

aagosh-e-khaam-e-halqaa-e-zunnaar men aave

gaaratagar-e-naamuus na ho gar havas-e-zar

kyon shaahid-e-gul baag se baazaar men aave

tab chaak-e-girebaan kaa mazaa hai dil-e-naadaan

jab ik nafas ulajhaa huaa har taar men aave

aatishkadaa hai siinaa meraa raaz-e-nihaan se

de vaaye agar ma'ariz-e-izhaar men aave

ganjiinaa-e-ma'anii kaa talism usako samajhiye

jo lafz kii "ghalib" mere ashaar men aave