jaur se baaz aaye par baaz aayen - Mirza Ghalib

jaur se baaz aaye par baaz aayen kyaa

kahate hain ham tum ko muunh dikhalaayen kyaa

raat din gardish men hain saat aasmaan

ho rahegaa kuchh na kuchh ghabaraayen kyaa

laag ho to us ko ham samajhen lagaav

jab na ho kuchh bhii to dhokaa khaayen kyaa

ho liye kyon naamaabar ke saath-saath

yaa rab apane khat ko ham pahuunchaayen kyaa

mauj-e-khuun sar se guzar hii kyon na jaaye

aastaan-e-yaar se uth jaayen kyaa

umr bhar dekhaa kiye marane kii raah

mar gae par dekhiye dikhalaayen kyaa

puuchhate hain vo ki "ghalib" kaun hai

koii batalaao ki ham batalaayen kyaa