jab bhii nazm-e-maikadaa badalaa gayaa - Fana Nizami Kanpuri

jab bhii nazm-e-maikadaa badalaa gayaa

ek na ek jaam-e-hasiin todaa gayaa

jab safiinaa mauj se takaraa gayaa

naakhudaa ko bhii khudaa yaad aa gayaa

main ne chhedaa qissaa-e-jaur-e-falak

jaane kyuun un ko pasiinaa aa gayaa

dekh kar un kii jafaaon kaa khuluus

main vafaa ke naam par sharmaa gayaa

aap ab aayen hain aansuu ponchane

jab mere daaman pe dhabbaa aa gayaa