ibtidaa-e-ishq hai rotaa hai kyaa - Meer Taqi Meer
ibtidaa-e-ishq hai rotaa hai kyaa
aage aage dekhiye hotaa hai kyaa
qaafile men subah ke ik shor hai
yaani gaafil ham chale sotaa hai kyaa
sabz hotii hii nahiin ye sarzamiin
tukhm-e-khvaahish dil men tuu botaa hai kyaa
ye nishaan-e-ishq hain jaate nahiin
daag chhaatii ke abas dhotaa hai kyaa
gairat-e-yusuf hai ye vaqt-e-aziiz
'Meer' is ko raayegaan khotaa hai kyaa
0 comments:
Post a Comment