ibn-e-mariyam huaa kare koii - Mirza Ghalib

ibn-e-mariyam huaa kare koii

mere dukh kii davaa kare koii

shuraa-o-aaiin par madaar sahii

aise qaatil kaa kyaa kare koii

chaal jaise kadii kamaan kaa tiir

dil men aise ke jaa kare koii

baat par vaan zubaan katatii hai

vo kahen aur sunaa kare koii

bak rahaa huun junuun men kyaa kyaa kuchh

kuchh na samajhe khudaa kare koii

na suno gar buraa kahe koii

na kaho gar buraa kare koii

rok lo gar galat chale koii

bakhsh do gar khata kare koii

kaun hai jo nahiin hai haajatamand

kisakii haajat ravaa kare koii

kyaa kiyaa khijr ne sikandar se

ab kise rahanumaa kare koii

jab tavaqqo hii uth gayii "ghalib"

kyon kisii kaa gilaa kare koii