husn gamze kii kashaakash se chhutaa - Mirza Ghalib
husn gamze kii kashaakash se chhutaa mere baad
baare aaraam se hai ahl-e-jafaa mere baad
mansab-e-shefatagii ke koii qaabil na rahaa
huii maazuulii-e-andaaz-o-adaa mere baad
shama bujhatii hai to us men se dhuaan uthataa hai
sholaa-e-ishq siyahaposh huaa mere baad
khuun hai dil khaak men ahavaal-e-butaan par, yaanii
unake naakhun hue mohataaj-e-hinaa mere baad
darakhur-e-arz nahiin jauhar-e-bedaad ko jaa
nigah-e-naaz hai surme se khafaa mere baad
hai junuun ahl-e-junuun ke liye aagosh-e-vidaa
chaaq hotaa hai garebaan se judaa mere baad
kaun hotaa hai hariif-e-mai-e-mard-afgan-e-ishq
hai mukarrar lab-e-saaqii pe salaa mere baad
gam se marataa huun ke itanaa nahiin duniyaa men koii
ke kare taaziiyat-e-mehar-o-vafaa mere baad
aaye hai bekasi-e-ishq pe ronaa 'ghalib'
kisake ghar jaayegaa sailaab-e-balaa mere baad
0 comments:
Post a Comment