husn-e-maah garche baahangaam-e-kamaal - Mirza Ghalib
husn-e-maah garche baahangaam-e-kamaal achchhaa hai
us se meraa maah-e-khurshiid-e-jamaal achchhaa hai
bosaa dete nahiin aur dil pe hai har lahajaa nigaah
jii men kahate hain muft aaye to maal achchhaa hai
aur baazaar se le aayen agar tuut gayaa
saagar-e-jam se meraa jaam-e-sifaal achchaa hai
betalab den to mazaa usamen sivaa mialtaa hai
vo gadaa jisako na ho khuu-e-savaal achchhaa hai
unake dekhe se jo aa jaatii hai muunh par raunaq
vo samajhate hain ki biimaar kaa haal achchhaa hai
dekhiye paate hain ushshaaq buton se kyaa faiz
ik birahaman ne kahaa hai ki ye saal achchhaa hai
hamsukhan teshe ne farahaad ko shiiriin se kiyaa
jis tarah kaa bhii kisii men ho kamaal achchhaa hai
qataraa dariyaa men jo mil jaaye to dariyaa ho jaaye
kaam achchaa hai vo jisakaa ma'aal achchhaa hai
khijr sulataan ko rakhe khaaliq-e-akbar sarsabz
shaah ke baag men ye taazaa nihaal achchha hai
hamako maaluum hai jannat kii haqiiqat lekin
dil ke khush rakhane ko ghalib ye khayaal achchha hai
0 comments:
Post a Comment