huii taakhiir to kuchh baais-e-taakhiir - Mirza Ghalib

huii taakhiir to kuchh baais-e-taakhiir bhii thaa

aap aate the magar koii inaangiir na thaa

tum se bejaa hai mujhe apanii tabaahii kaa gilaa

us men kuchh shaaib-e-khuubii-e-taqadiir bhii thaa

tuu mujhe bhuul gayaa ho to pataa batalaa duun

kabhii fitaraak men tere koii nakhchiir bhii thaa

qaid men hai tere vahashii ko vahii zulf kii yaad

haan kuchh ek ranj-e-garaanbaari-e-zanjiir bhii thaa

bijalii kaund gaii aankhon ke aage, to kyaa

baat karate, ke main lab tashnaa-e-taqariir bhii thaa

yusuf us ko kahuun aur kuchh na kahe, khair huii

gar bigag baithe to main laayaq-e-ta'ziir bhii thaa

dekh kar gair ko kyuun ho na kalejaa thandaa

naalaa karataa thaa vale taalib-e-taasiir bhii thaa

peshe men aib nahiin, rakhiye na farhaad ko naam

ham hii aashuftaa-saron men vo javaan 'Meer' bhii thaa

ham the marane ko khade paas na aayaa na sahii

aakhir us shaukh ke tarakash men koii tiir bhii thaa

pakade jaate hain farishton ke likhe par naahak

aadamii koii hamaaraa dam-e-tahariir bhii thaa

rekhtaa ke tumhiin ustaad nahiin ho "ghalib"

kahate hain agale zamaane men koii 'miir' bhii thaa