hasarat hai tujhe saamane baithe kabhii dekhuun - Kishwar Naheed

hasarat hai tujhe saamane baithe kabhii dekhuun

main tujh se mukhaatib huun teraa haal bhii puuchhuun

dil men hai mulaaqaat kii khvaahish kii dabii aag

mehandii lage haathon ko chhupaa kar kahaan rakhuun

jis naam se tuune mujhe bachapan se pukaaraa

ik umr guzarane pe bhii vo naam na bhuluun

tuu ashk hii ban ke merii aankhon men samaa jaa

main aaiinaa dekhuun to teraa aks bhii dekhuun

puuchhuun kabhii gunchon se sitaaron se havaa se

tujh se hii magar aa ke teraa naam na puuchhuun

ai merii tamannaa ke sitaare tuu kahaan hai

tuu aaye to ye jism shab-e-gam ko na saunpuun