biimaar hain to ab dam-e-isaa kahaan se aaye - Kishwar Naheed

biimaar hain to ab dam-e-isaa kahaan se aaye

us dil men dard-e-shauq-o-tamannaa kahaan se aaye

bekaar sharaa-e-lafz-o-maanii se faayedaa

jab tuu nahiin to shahar men tujh saa kahaan se aaye

har chashm sang-e-khizb-o-adaavat se surkh hai

ab aadamii ko zindagii karanaa kahaan se aaye

vahashat havas kii chaat gaii khaak-e-jism ko

be-dar gharon men shaql kaa saayaa kahaan se aaye

jad se ukhad gaye to badalatii ruton se kyaa

be-aab aaiinon men saraapaa kahaan se aaye

saayon pe aitamaad se uktaa gayaa hai jii

tuufaan men zindagii kaa bharosaa kahaan se aaye

gam ke thapere le gaye naagin se lambe baal

raaton men jangalon kaa vo saayaa kahaan se aaye

'naheed' faishanon ne chhupaaye hain aib bhii

chashmen na hon to aankh kaa pardaa kahaan se aaye