hamaaraa kyaa hai ke ham to chiraaG-e-shab kii tarah - Mohsin Naqvi

hamaaraa kyaa hai ke ham to chiraaG-e-shab kii tarah

agar jale bhii to bas itanii raushanii hogii

ke jaise tund andheron kii raah men juganuu

zaraa sii der ko chamake chamak ke kho jaaye

phir is ke baad kisii ko na kuchh sujhaaii de

na shab kate na suraaG-e-sahar dikhaaii de

hamaaraa kyaa hai ke ham to pas-e-Gubaar-e-safar

agar chale bhii to bas itanii raah tay hogii

ke tez havaaon kii zard maail naqsh-e-qadam

zaraa sii der ko ubhare ubhar ke mit jaaye

phir us ke baad na raastaa na rahguzar mile

hadd-e-nigaah talak dasht-e-bekinar mile

hamaarii simt na dekho ke koii der men ham

qabiilaa-e-dil-o-jaan judaa hone vaale hain

base basaaye huye shahar apanii aankhon ke

misal-e-khaanaa-e-viiraan ujadane vaale hain

havaa kaa shor ye hii hai to dekhate rahanaa

hamaarii umar ke khemen ukhadane vaale hain