bichhad ke mujh se kabhii tuu ne ye bhii sochaa hai - Mohsin Naqvi

bichhad ke mujh se kabhii tuu ne ye bhii sochaa hai

adhuuraa chaand bhii kitanaa udaas lagataa hai

ye vasl kaa lamhaa hai ise raayegaan na samajh

ke is ke baad vahii duuriyon kaa saharaa hai

kuchh aur der na jhadataa udaasiyon kaa shajar

kise khabar tere saaye men kaun baithaa hai

ye rakh-rakhaao muhabbat sikhaa gaii us ko

vo ruuth kar bhii mujhe muskuraa ke milataa hai

main kis tarah tujhe dekhuun nazar jhijhakatii hai

teraa badan hai ke ye aaiinon kaa dariyaa hai