din guzar gayaa aitabaar men - Fana Nizami Kanpuri

din guzar gayaa aitabaar men

raat kat gaii intazaar men

vo mazaa kahaan vasl-e-yaar men

lutf jo milaa intazaar men

un kii ik nazar kaam kar gaii

hosh ab kahaan hoshiyaar men

mere kaase men kaayenaat hai

main huun aap ke ikhtiyaar men

aankh to uthii phuul kii taraf

dil ulajh gayaa husn-e-khaar men

tum se kyaa kahen kitane gam sahe

ham ne be-vafaa tere pyaar men

fikr-e-aashiyaan har khizaam kii

aashiyaan jalaa har bahaar men

kis tarah ye gam bhuul jaaye ham

vo judaa huaa is bahaar men