dekhanaa bhii to unhen duur se dekhaa karanaa - Hasrat Mohani
dekhanaa bhii to unhen duur se dekhaa karanaa
shevaa-e-ishq nahiin husn ko rusavaa karanaa
ik nazar hii terii kaafii thii ki ai raahat-e-jaan
kuchh bhii dushvaar na thaa mujh ko shakebaa karanaa
un ko yaan vaade pe aa lene de ai abr-e-bahaar
jis tarah chaahanaa phir baad men barasaa karanaa
shaam ho yaa ki sahar yaad unhiin kii rakh le
din ho yaa raat hamen zikr unhiin kaa karanaa
kuchh samajh men nahiin aataa ki ye kyaa hai 'hasrat'
un se milakar bhii na izhaar-e-tamannaa karanaa
0 comments:
Post a Comment