be-aitadaaliyon se subuk sab men ham hue

be-aitadaaliyon se subuk sab men ham hue

jitane ziyaadaa ho gaye utane hii kam hue

pinhaan thaa daam sakht qariib aashiyaan ke

udane na paaye the ki giraftaar ham hue

hastii hamaarii apanii fanaa par daliil hai

yaan tak mite ke aap ham apanii qasam hue

sakhtii_kashaan-e-ishq kii puuchhe hai kyaa khabar

vo log raftaa-raftaa saraa_paa alam hue

terii vafaa se kyaa ho talaafii ki dahar men

tere sivaa bhii ham pe bahut se sitam hue

likhate rahe junuun kii hikaayat-e-khuun_chakaan

harchand is men haath hamaare qalam hue

allaah re! terii tundii-e-khuu jis ke biim se

azzaa-e-naalaa dil men mere rizqe-ham hue

ahal-e-havas kii fatah hai tark-e-nabard-e-ishq

jo paanv uth gaye vo hii un ke alam hue

naal-e-adam men chand hamaare supurd the

jo waan na khinch sake so wo yaan aake dam hue

chodii 'Asad' na ham ne gadaa_ii men dil_lagii

saa_il hue to aashiq-e-ahal-e-karam hue