avval avval ki dosti hai abhi - Ahmed Faraz
avval avval ki dosti hai abhi
ik ghazal hai k ho rahi hai abhi
main bhi shehr-e-wafa mein nau-vaarid
wo bhi ruk ruk k chal rahi hai abhi
main bhi aisa kahan ka zood-shinaas
wo bhi , lagta hai , sochti hai abhi
dil ki waaraftagi hai apni jagaa
phir bhi kuch ehteyaat si hai abhi
gar-cheh pehla sa ijtanaab nahin
phir bhi kam kam sapurdagi hai abhi
khud-kalaami mein kab ye nasha tha
jis tarha ru-ba-ru koi hai abhi
qurbatein laakh khoobsoorat hon
dooriyon mein bhi dil-kashi hai abhi
raat kis maah-wash ki chaahat mein
shabnamistaan saja rahi hai abhi
main bhi kis vaadi-e-khayaal mein tha
barf si dil pe gir rahi hai abhi
zindagi ku-e-na-muraadi se
kisko mur mur k dekhti hai abhi
iss qadar khich gaee hai jaan ki kamaan
aisa lagta hai tootti hai abhi
aisa lagta hai khalvat-e-jaan mein
wo jo ik shakhs tha wohi hai abhi
muddatein ho gaeen faraz magar
wo jo deewaangi k thi,hai abhi
0 comments:
Post a Comment