vusa't-e-chashm ko andoh-e-basaarat likhaa - Azm Behzad

vusa't-e-chashm ko andoh-e-basaarat likhaa

main ne ik vasl ko ik hijr kii haalat likhaa

main ne likkhaa ke safaa-e-dil kabhii khaalii na ho

aur kabhi khaalii ho bhii to malaamat likhaa

main ne paravaaz likhii hadd-e-falaq se aage

aur be-baal-o-parii ko bhii nihaayat likhaa

main ne dastak ko likhaa kash-ma-kash-e-be-khabarii

jumbish-e-pardaa ko aane kii ijaazat likhaa

main ne khushbuu ko likhaa dastaras-e-gum-shudagii

rang ko faasalaa rakhane kii riyaayat likhaa

zakhm likhane ke liye main ne likhii hai gafalat

khuun likhanaa thaa magar main ne haraarat likhaa

husn-e-goaaii ko likhanaa thaa likhii saragoshii

shor likhanaa thaa so aazar-e-sama'at likhaa

main ne taabiir ko tahariir men aane na diyaa

khvaab likhate hue mohataaj-e-bashaarat likhaa

koii aasaan rafaaqat nahiin likhii main ne

qarb ko jab bhii likhaa jazb-e-raqaabat likhaa

itane daaon se guzar kar ye khayaal aataa hai

'Azm' kyaa tum ne kabhii harf-e-nadaamat likhaa