jo kuchh kaho qubuul hai taqaraar kyaa karuun - Anwar Shaoor
jo kuchh kaho qubuul hai taqaraar kyaa karuun
sharmindaa ab tumhen sar-e-baazaar kyaa karuun
maaluum hai ki paar khulaa aasamaan hai
chhutate nahiin hain ye dar-o-diivaar kyaa kauun
is haal men bhii saans liye jaa rahaa huun main
jaataa nahiin hai aas kaa aazaar kyaa karuun
hain vaa-shigaaf mujh pe tumhaarii inaayaten
jo ankahii na ho use izahaar kyaa karuun
phir ek baar vo rukh-e-maasuum dekhataa
khulatii nahiin hai chashm-e-gunahagaar kyaa karuun
ye pur-sukuun subah ye main ye fazaa "Shaoor"
vo so rahe hain ab unhen bedaar kyaa karuun
0 comments:
Post a Comment