zulmat-e-shab men ujaalon kii tamannaa na karo - Kamraan Najmi
zulmat-e-shab men ujaalon kii tamannaa na karo
khvaab dekhaa hai to ab khvaab ko rusvaa na karo
bojh suuraj kaa padegaa to lachak jaayengii
raat kii surmaii shaakhon pe baseraa na karo
khvaab ummiid nashaa saans tabasuum aansuu
tuutane vaalii kisii shay pe bharosaa na karo
ham ne aankhon ko jalaayaa thaa ki kuchh dhundh chhate
tum naii nasl ke suuraj ho tum aisaa na karo
ashk piine kaa hunar siikh lo ham se aakar
jazbaa-e-dil ko nigaahon se havedaa na karo
mausamii barf hain kuchh der men bah jayenge
in badalate hue rishton pe bharosaa na karo
ye fazaa raas na aayegii tumhen ai "najmi"
yaad guzare hue lamhaat kii taazaa na karo
0 comments:
Post a Comment