zindagii tujh ko jiyaa hai koii afsos nahiin - Sudarshan Faakir
zindagii tujh ko jiyaa hai koii afsos nahiin
zahar Khud maine piyaa hai koii afsos nahiin
maine mujarim ko bhii mujarim na kahaa duniyaa men
bas yahii jurm kiyaa hai koii afsos nahiin
merii qismat men likhe the ye unhiin ke aansuu
dil ke zaKhmon ko siyaa hai koii afsos nahiin
ab gire sang ki shiishon kii ho baarish 'Fakir'
ab kafan od liyaa hai koii afsos nahiin
0 comments:
Post a Comment